【Now財經台】深圳再出招救樓市，宣布局部放寬限購，不過，內房板塊今朝(7日)表現唔算興奮。花旗投資策略及財富策劃部主管廖嘉豪認為，當局可能想先試市場水溫，再調整政策方向，預期將會有更多一線城市放寬限購政策。
KA又指，近月多項樓市消息亦反映內房整體銷售及融資環境較半年前好轉，而內地一手銷售數字漸見穩定跡象。佢引述花旗分析指，該行追蹤嘅35間在港上市內房企業，上月一手銷售額按年跌約40%，預期下半年跌幅會收窄至10%，到第4季或進一步收窄至5%。
KA續指，二手交投亦轉趨活躍，指內地17個主要城市於3月錄得逾1.9萬宗成交，上月買賣宗數更突破2萬，而房地產仲介提供嘅睇樓數字亦有上升，反映仍然有一定換樓需求支持樓市。
