【Now財經台】美國4月就業數據差過預期，令市場對聯儲局減息預期再升溫，美國債息下跌，美股3大指數隔晚(6日)高收。此外，紐約聯儲銀行行長威廉斯(John Williams)最新指，聯儲局最終都會減息，時間就取決於數據。係咪反映減息問題開始明朗化？今年係咪最少減息1次？
高富金融集團投資總監梁偉民認為，美國減息時間仍未明朗，雖然非農數據冇預期咁強勁，但已令今年減息嘅可能性增加，不過，股市及債市嘅即時反應，反映市場對美國減息問題仍非常敏感，即使只係一兩個數據已足以影響減息預期。佢又話，一旦下個月嘅經濟數據再度轉強，市場睇法又隨時有變。
不過，Wyman認為，美國今年減息機會仍高，因為下半年經濟好難好似依家咁強勁，佢估計，聯儲局會喺第3季開始減息，今年減息1至2次。
