【Now財經台】滙豐控股(00005)喺「五一黃金周」假期前公布嘅首季業績勝預期,股價暫時連升第8個交易日,今朝曾高見69.2元,係2008年6月以來高位。
星展香港環球金融市場上市產品主管周國威表示,唔少滙控好友食糊,周二(4月30日)錄得約400萬元資金流出好倉,亦有好友換馬至輕微價外嘅CALL輪,博股價繼續向上,同時鎖定部分利潤。
Dick續指,好友可以留意今朝成交活躍嘅CALL,行使價72元,9月至10月到期,槓桿有11倍,而引伸波幅喺績後變化唔大,仍處於約20%嘅低水平。如果正股股價升穿70元,呢批CALL就由現時5%至6%價外變成價內,爆發力十足。