【now.com財經】近日有多少心煩，在香港經濟環境復甦之際，突然爆了一個關注舖頭執笠群組，不時有人將一些吉舖，或者街道比較靜的相片放上群組，證明香港已經玩完，其實，我所見的情況又唔係咁差，雖然有很多香港人出外旅遊，以及北上消費，但亦有很多內地人士來港旅遊以及購物，而且在港消費的內地人士是比較高檔，所買的亦是高質素商品，況且有執笠亦有開張，不能單方面報道。
無論有冇這個執笠群組，可能職業需要，我平時行街時都會非常留意有冇吉舖，老實說，如果吉舖不斷增加，想話個市都好艱難，在疫情過後，尤其是撤辣之後，市面經濟好轉，空置舖位不斷減少，證明開張多過結業，如果只是聽一面之詞，相信執笠關注組所講，就會以為經濟環境很差，所以，自己經歴總好過聽人講。
星期一中午我約了會德豐黃光耀在尖沙咀港威食飯，本來最方便是司機載我過去，但我想睇下星期一市況，於是叫司機載我去灣仔碼頭，我自己坐天星小輪去尖沙咀，我發覺小輪有八成滿，大多數是內地人，不是旅行團，而是一家大小或者幾個年青人一起旅行，這些自由行的消費力相當高，有咁多高消費的內地人，個市唔應該太差。
去到海運大廈以及海港城，只見人頭湧湧，根本唔似星期一早上，不少名店門口有人排隊等入去，老實說，那些名店所買的貨品價值不菲，咁多人排隊證明生意唔錯，相信執笠關注組唔會關注那些鎖碎的事，除非有舖頭執笠。
執笠群組認為北上消費以及租金太高，而令到不少舖頭執笠，我唔反對這個理由，不過，人手長期不足亦是原因之一，亦有不少舖頭老闆做了幾十年，而子女學業有成，唔想承接祖業而結業，那些老闆唔想人誤會，直言自己想嘆世界，唔想再做，他們只是結業不是執笠，所以，舖頭執笠關注組不用關注他們。
