【now.com財經】上個星期五(4月12日)揀咗隻恒指熊(65072)出嚟，喺上半場以平均0.0645元買入，喺【輪證下半Part】mark過以小時圖100線為目標。
去到下半場時，指數其實波幅都唔大，不過，去到2點10分時，五分鐘圖上見保歷加通道口忽然拓闊，指數向下，望望小時圖100線當時見16,720點，過多10分鐘見指數壓到去16724點之後同Slow STC(14.3)一齊回，同步保歷加通道開始收窄返，(65072)算是到步後要走，反正星精五更加以以Day Trade為主。
按2點25分時見指數壓唔穿小時圖100線兼Slow STC(14.3)借保歷加通道口收窄而出觸底下，如常用10分鐘走(65072)，期內(65072)高低位做過0.072元/0.069元，平均走貨價為0.0705元。呢一趟少少時間換格仔啦，平均執6格或9.3%，總數正數。
周末一早同我家老爺出咗去旺角飲茶，原因係一位舊同事由英國返港，再約埋以前另外兩個舊同事一行五人見個面，約呢個時間都係就番返港條友行程緊密，無乜所謂，想見嘅朋友就算係點你都係會想見；年紀大你就會明架啦。
呢期中東嗰邊作勢出WWIII咁款，姨姨我國際關係呢一科向來都係唔合格嘅多，但見到呢期啲新聞都係影住個夜空然後有啲閃燃嘅飛彈都知咩事，怪不得啲金價搶到準備年底結婚嘅舊同事都話唔知點算；有咩好點算，傻妹，唔通唔結咩！
政局不穩同步亦會拖低股市走勢，今朝亞洲跌到甩頭甩骨，港股今朝開跌234點，報16,487點，一開市見吞2149張期指，到依家9點58分，16,400至16,499點呢層第一層過千張牛證街貨層都未死，已經算比面。
作戰室今日都chur，本來Plan定出淡倉直落去追，結果開市秒變反手好倉變陣，6分鐘過去見「平頂」即棄好轉淡，落到指數借今朝小時圖拉住嘅16,480點量度線後，作戰室再反手棄淡轉好第三注爬格仔。
得啦！呢度睇小時圖嘛，拉返16,480點嗰條線出嚟，依家10點5分，目前指數仍然處於呢條量度線之上，上 面啲平均線實在太遠，暫時嚟講作用不大，而保歷加通道仍然拓闊下，Slow STC(14.3)仍然有條件出超賣再超賣，換言之，16,480點呢條量度線變成好淡倉界線。
線上企到嘅，恒指牛(53433)，收回價16,100點，同現價有約370點距離，約37.43倍槓桿夠做Day Trade；若然指數受唔住重貨牛嘅引誘，向下再落「除三層」過千張貨牛咁痴線的話，恒指熊(54989)，收回價16,829點，同現價有約360點距離，今日新上市為市場上最貼價熊證中，槓桿最高又最活躍。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
