【Now財經台】截至早上10時45分止，1小時內《彭博》用戶關注度上升最多首5隻港股，依次為交通銀行(03328)、中國銀行(03988)、中國人壽(02628)、友邦保險(01299)、融創中國(01918)。
交行股價今早(28日)最多跌近5%，低見5.02元，集團昨日(27日)收市後出咗業績，去年僅多賺0.6%，派末期息37.5分人仔，同2022年差唔多。摩根大通指，交行上季淨息差(NIM)得1.23厘，係主要內銀中最低，交行管理層又預期，今年NIM仍會受壓。
椽盛資本投資總監曾永堅認為，市場憂慮交行淨息差將進一步受壓，影響未來盈利能力同派息前景，令股份今朝要捱沽。佢續指，交行規模不及「四大內銀」，即使內地利率下行，為咗維持存款吸引力，集團好難同步降低貸款同存款利率，而且交行喺內地信貸市場嘅份額佔比唔算大，加上信貸需求復甦緩慢，未來交行利息收入要抵銷到支出有難度。
