【Now財經台】截至早上10時45分止，1小時內《彭博》用戶關注度上升最多港股，依次為國泰航空(00293)、長和(00001)、港交所(00388)、比亞迪股份(01211)中國移動(00941)。
國泰股價今早(26日)一度升逾4%，升穿保歷加通道頂，《彭博》喺港股上周五(23日)收市後報道，國泰第2大股東中國國航(00753)就增持國泰嘅可能性徵求顧問意見。受疫情、內地經濟復甦動力弱夾擊，國航已連蝕3年，直至今年首9個月終轉賺逾7億人仔，但表現仍不及國泰。國泰之前預期，去年最少賺86億元，係2010年以來最高水平。此外，香港快運(HK Express)上月載客突破200萬，同期載貨量亦按年增長逾20%，反映國泰轉為經營一條廉航嘅策略正確，盈利能力強，呢啲係咪國航想增持嘅誘因？
富昌證券聯席董事譚朗蔚認為，相信國航作為國泰第2大股東，有意增持都唔會係短線投資，好大程度上係希望喺業務上有更多協同效應，以及提升控制能力。國泰近期股價及業績都比較優勝，各項營數據回穩，甚至有較理想嘅增長。佢認為，中長線而言，股東增持及業績復甦，都會利好國泰股價表現。
佢又指，國泰股價今日一度衝破2023年12月高位，即8.4元水平，但未能企穩，相信後市有利好消息配合下，走勢仍可睇高一線，如果可以企穩8.4元，下一站可挑戰2023年8月高位，即9元水平。
