【now.com財經】話說，我母親大人今日終於都可以用樂悠卡啦！佢今日初嚐$2搭地鐵一嘟，個地鐵站職員好疑惑咁望住佢，可能覺得佢唔似60歲，母親大人表示當時佢嘅心態就好似細個去買煙然後被便利店職員查身份證一樣咁期待，但最後人哋都無查佢，當然佢唔會因為呢啲事而失望啦，因為佢仲有$100嘅樂園入場費等緊佢。
出面仍然非常大霧，大霧到窗出面只係白茫茫一片；而指數今朝開市升37點之後，到依家9點50分，指數上上落落chok到嘔白泡，如果追住佢咁上落的話，就真係嘔得多就死得早，所以作戰室到依家為止都仲係等，等佢冷靜啲，等佢有個明確少少嘅方向，而唔同係出面個天一樣：白茫茫一片。
睇咗個牛熊證街貨圖先。今日街貨圖上見兩邊都未有新增街貨層之下，牛證第一層為15400至15499點，呢層其實被噚日恒指追殺咗唔少，所以得返相當於58張期指；不過喺15300至15399點呢度仲有1041張期指，同依家9點56分恒指報15483點計，即指數向下落多84點就行到去呢層肥牛嘅門口。至於熊證方面，第一層見15900至15999點，呢度都有相當於697張期指街貨，同現價有400幾點嘅距離。似乎以貨量同距離計，點都係出淡倉向下追肥牛。
耐性比咗成半個小時之後開始見到有啲方向，真架，有時係會遇上呢啲好不確定情況，寧願唔郁唔出倉唔賺錢，都要封住自己有機會輸錢嘅門口，無信用唔好出動，因為似乎今日街貨 VS 技術分析，後者想贏。
喺作戰室度咗成半個鐘，於五分鐘圖上見指數終於踩得住10/20線之後，拉好晒線講定比好倉，有啲打突嘅，事關過千張肥牛唔追，竟然反手出牛追升？係呀，因為小時圖終於都等到佢Slow STC(14.3)出觸底啦嘛，仲要整條保歷加向下，10線有機會成為第一步阻力，不過依家10點10分都開始見過得到。
恒指牛(68089)，收回價15100點，同現價有約380點距離，槓桿有約32.27倍，企上小時圖10線嘅話，出牛或Hold牛都可以，耐少少嘅，即係唔做DT嘅，借小時圖條Slow STC(14.3)觸底炒返上去超買位可以嘅，如常唔過夜嘅，咁咪睇住小時圖20線先囉。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
