【Now財經台】國企指數今日(29日)又跑贏大市，資金繼續掃中特估概念股，其中，中國鐡塔(00788)連續兩個交易日喺大成交下急升，今日更打入20大成交榜，鐡塔派息比率超過60%,，業績又穩陣，係咪都唔會炒錯？
信達國際研究部董事趙晞文指冇炒錯，鐡塔係1隻畀市場遺忘咗嘅國企股，過去幾年，集團收入等增長都相對穩定，未來焦點會落喺盈利增速，因為鐡塔當年係3大電訊商收購返嚟嘅折舊及攤銷期，將會喺2025年屆滿，意味盈利將會進一步釋放，分紅派息將有提升空間，若集團更詳細披露分紅政策，甚至比到市場驚喜，相信有好大估值重估空間。
股價方面，趙晞文憧憬，即係買緊預期嘅情況下，估值短期市盈率(PE) 0.7倍，股價要喺現水平再升10%唔難。
