【Now財經台】截至早上11時止，1小時內《彭博》用戶關注度上升最多首6隻港股，依次為新世界發展(00017)、比亞迪股份(01211)、碧桂園(02007)、萬科企業(02202)、遠洋集團(03377)、中國銀行(03988)。
本地地產股新世界喺重磅科網股季績期間爆冷登上榜首，皆因上周末集團主席鄭家純喺旗下免費電視嘅專訪大談接班人問題，又話會喺合適環境下盡量分拆業務上市，並指成為公眾企業有助未來傳承業務。
新世界股價今朝開市冇耐一度升1%，但見咗暫時高位15.48元後就偏軟。富昌證券聯席董事譚朗蔚認為，投資者純粹係八卦一下鄭家純專訪內容，雖然新世界近年多咗動作，例如旗下公司提全購或私有化，有唔少合併重組概念，但市場對集團早前賣新創建集團(00659)持股反應唔算熱烈。
Stevan續指，市場對新世界債務問題嘅憂慮仍未減退，預期股價會持續低迷。
