【Now財經台】晶片股華虹半導體(01347)股價午後愈跌愈多，更創52周新低，仲拖埋同板塊嘅中芯國際(00981)落去跌幅一度擴大。睇返呢兩隻晶片股業績，華虹整體表現都比中芯差，尤其係毛利率，中芯係19.8%，華虹僅16.1%，係咪因為技術low end嘅晶圓代工廠經營環境較差，要減價搶單，拖低華虹毛利率？
紅蟻資本投資總監李澤銘認為，華虹嘅情況的確令人擔心，毛利率由今年第1季嘅32.1%，一路跌到第3季嘅16.1%，睇返第4季指引更會跌到2%至5%，似乎供求失衡嘅情況幾嚴重，相信同公司嘅客戶有關，因為過去1至2年受疫情影響，全球芯片供應不足，華虹生產嘅中低端芯片特別缺貨，所以當時有好多新增產能。
佢續指，疫後本來環球供應鏈恢復，產能又增加，但下游需求除咗電動車，大部分都跟住環球經濟轉弱，喺供過於求下，加上華虹本身產能都增加咗好多，為咗保住產品利用率及客戶，只能主動減價搶單，導致毛利率出幅下滑。
中芯方面，Alan話公司毛利率早已跌咗落嚟，今年大部分時間都維持19%至20%水平，由於第4季受非經營因素影響，預期毛利率會跌至介乎16%至18%，但連續4個季度都維持喺一定水平。
