【Now財經台】過往同債息同步嘅股份，係咪應該開始要避開，例如下周一(30日)出業績嘅滙豐控股(00005)，喺利率向上下，憧憬息差擴闊會利好滙控，但喺息口就快見頂下，利好係咪已經反映晒，集團第4季表現係咪會較差？
冠域商業及經濟研究中心主任關焯照認為，要視乎息口維持喺高水平幾耐，雖然息口快見頂，甚至可能已見頂，但高息會維持一段長時間，股價係炒預期，所以滙控息差擴闊嘅利好因素就會消失，理論上股價表現會較差。
不過，集團有做回購，會對股價有支持，加上英鎊由年初1.03水平低位，反彈至1.21水平，但滙控最大問題係唔清楚集團內房嘅借貸及投資情況，睇返渣打集團(02888)因為內房撥備多咗，畀市場一個唔好嘅印象，會令人質疑滙控係咪同樣有呢個情況，股價近期跌得比較多，如果最終盤數睇到撥備情況唔係咁差，股價有機會彈上60元。
