【Now財經台】港股喺第4季首個交易日出師不利，恒生指數一度瀉近600點，多個板塊成重災區，其中，黃金周概念股跌得最急係電影相關股，貓眼娛樂(01896)及阿里影業(01060)齊大跌8%，係咪票房表現不似預期拖累股價？
英皇資本財富管理方案研究總監陳錦興指，市場對黃金周票房期望好高，因為見到暑假票房收入强勁，因此，希望長假期都大收，一般嚟講，電影票房係上映頭幾日最爆，但數字都冇預期咁强勁，《堅如磐石》、《志願軍:雄兵出擊》票房都有幾億人仔，但唔算太突出，令市場感到失望，繼而推低相關股份股價。
佢又話，影視娛樂股6月開始反覆上升，股價喺黃金周前已升至高位，反映市場對票房嘅期望甚高，但最終數字同預期有落差，令股價顯著下挫。
