【Now財經台】女性內衣品牌都市麗人(02298)喺本港上市就快10年，不過，早幾年就以「二次創業」去形容新發展路向，都市麗人內地發展策略係點？
都市麗人副總裁兼首席財務官蔡瑋軒表示，依家公司嘅品牌定位係全國銷售領先、國民品牌嘅內衣，主打大眾化市場，以非一二線城市為主。佢又指出，截至2023年6月底止，集團有約4200間門店，未來計劃開多1000間分店，遍布主要省份，包括廣州及河南等地。此外，會繼續聚焦擴展下沉市場，即三至五線城市。
蔡瑋軒續稱，進行數字化改革後，加盟商可透過都市麗人新推出嘅線上訂貨平台訂貨，公司亦同阿里巴巴(09988)合作，透過人工智能(AI)系統搜集消費者喜好或流行數據，Henry補充，雖然進行咗數字化改革，但線下渠道仍然係公司未來一兩年嘅主要發展方向。
Henry又指，8月公布嘅中期業績，反映集團營運模式愈來愈健康，以及受加盟商歡迎，上半年有逾800間加盟店簽約開店，較去年同期大幅增長，呢啲數字都反映公司嘅改革成效，以及客戶對都市麗人嘅信心。
