【Now財經台】從事原油及液化天然氣水上運輸嘅中遠海能(01138)，股價今日見1個月高位，一度升近4%至8.9元。
原來公司獲高盛首予「買入」評級及9.8元目標價，又話睇好公司作為全球油輪船隊運力規模世界第一，將受惠原油及成品油輪嘅上升周期。元宇證券投資總監林嘉麒表示，仲有幾個因素繼續利好中遠海能。
KK指出，歐盟對俄羅斯石油禁運生效，令石油供應持續緊張，加上油輪路線要改道為由俄羅斯至亞洲，或者中東、北美至歐盟，又話油輪一向供應有限，行業整體運力不足，令過去1年多石油成本價同航運價格都高居不下，中遠海能亦因此成為今年航運板塊中盈利表現最好嘅公司。
KK續指，沙特出乎市場意料延長減產至年底，以及中國對石油需求增加，仍會利好中遠海能未來業務表現。
