【now.com財經】上星期五(8月18日)本以為指數會喺日線圖上行出「身懷六甲」形態，但可惜最終生出嚟嘅形態要打個折，明嘅，市場係由人造出嚟，hand make嘅又點會次次都做到同教科書一模一樣先得架，所以今朝返嚟開市見指數向下再落，跌152點，開市報17,798點，將牛證首兩層街貨全數收回，當中一層係重貨區，有相當於1,208張期指；另一層則為最多新增街貨層，有相當於681張期指。兩層夾埋有1,889張期指。
及至開市，指數有再向下落，稍為計過如果恒指連17,500至17,599點嗰層過千張期指都殺埋的話，計及開市跌幅152點，今日全日如果跌到450點，指數就會落到17,500點呢個位，順便將中間嘅17,700至17,799點，同埋17,600至17,699點嘅牛證街貨都殺埋，計一計呢五層總數係有相當於4,456張期指街貨。咁食法應該都飽到下個星期期結日。
依家9點47分，作戰室第一注淡倉未開市前已經計劃出動，不論過夜嘅還是即市開嘅都率先取得正數。嚟到呢個位，恒指連17,700至17,799點都食埋，即Total 食咗2,717張期指，距離「目標」仲有1,739張期指同埋跌多200點左右。今日恒指再今年內新低，我估唔止作戰室嘅戰友，應該有唔少人繼續追沽。
「跌到咁應該都夠啦？」從來都唔估底觸頂，順勢而行即跟大隊死極有個譜。睇返今日恒指牛熊證街貨圖，見今日有一層新上市熊證上市，見最貼有18,500至18,599點，本來同上週五收市口價計都有300零點距離，尚算Ok。但依家(9點55分)，指數跌幅擴大至跌逾300點，即使今日見有新貼熊、收回價見18,300至18,399點，但呢個位同現價都已經有約650點距離。牛證唔駛數，每落一級就殺多一浸。好明顯指數靠死一邊證嘅同時，同另一邊仲有幾條街嘅距離嘅情況仍然持續，唯一可以令到市忽然轉向的話，大家可能寄望喺星期五(8月25日)鮑爺喺Jackson Hole年會上嘅講話，或者等發行商出番多啲貼價熊，將牛熊證嘅距離拉近返，夾住恒指。
但喺呢件事仲未出現之下，指數下行嘅機會實在太大，只不過係依家行到10點7分，指數向下落咗一浸之後，都要啲時間比番五分鐘圖上見Slow STC(14,3)同指數回一回，鬆一鬆見。恒指熊(52279)，收回價18,324點，為市場上最貼價+同一槓桿嘅熊證中成交最活躍，因為新上市所以未有街貨。
如常的用返Swing Trade去應市。依家10點10分見恒指喺五分鐘圖出觸底兼上破10線，跌幅亦見收窄至跌185點，進取嘅如果見指數唔過中軸就出手；安全嘅如常用返Slow STC(14,3)出觸頂向下之後出動啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
