【Now財經台】政府今季只推出兩幅地皮,其中,堅尼地城西寧街項目以每呎樓面地價約7070元批出,創港島區21年新低,期內亦有項目流標。
除咗樓市氣氛唔好,嘉華國際(00173)營業及市場策劃總監(香港地產)温偉明認為,地皮發展條款複雜都會影響發展商投地意欲及出價。
Tony又指,近年推出嘅地皮大部分都唔係「熟地」,發展商起樓前,動輒要花3至5年幫政府包底,做好基礎設施如水、電、通訊及燃氣等規劃,要承擔唔少隱藏成本。
温偉明續稱,政府要求發展項目嘅公眾設施落成後,先可以推售樓盤,亦會拖慢發展商賣樓進度,由以往2至3年拖長到6至7年,喺當前嘅高息環境下,發展商愈遲賣樓就愈遲收錢,無疑會增加利息成本,投地自然變得保守。
Tony認為,政府應考慮容許發展商將公眾設施部分同住宅部分分開興建,以加快私樓單位供應。