【Now財經台】截至早上11時止，1小時內《彭博》用戶關注度上升最多港股，依次為遠洋集團(03377)、比亞迪股份(01211)、碧桂園(02007)、美團(03690)及中芯國際(00981)。
晶片戰升級，中國反擊歐美限制，昨宣布8月起限制半導體關鍵金屬材料鎵、鍺出口，最新發展係荷蘭外交部話，歐盟必須回應事件。依家中國係最大鎵、鍺出口國，限制出口對相關股份唔係一面倒利好，開採呢兩種原材料嘅中國稀土(00769)今朝一度炒高10%，但中芯股價向下。
盈寶證券投資顧問總監譚智樂認為，管制措施對兩隻股份都冇幫助，喺中國被歐美圍堵下，芯片研發短期難有突破，加上經濟衰退風險仍然存在，對經濟敏感嘅半導體行業亦會受拖累。
至於中國稀土，Arnold指，公司市值僅約10億元，半日成交金額僅逾700萬元，似係炒作消息多過睇好前景，股價已連升兩日，佢認為唔值得追入。
