【Now財經台】華寶國際(00336)主席兼控股股東朱林瑤已獲公安局取消監視居住，刺激股價今日價量齊升，股價今朝裂口高開近15%後，升幅一度擴大至31%，高見3.8元，其後升幅收窄，成交金額突破1億元，成交股數較過去100日同時段平均飆38倍。
有「香精女王」之稱嘅朱林瑤可以復工，刺激股價今朝裂口抽升，但喺高位有大量沽盤，因為當局係咪已完成對朱林瑤嘅調查，仍存在不確定性，可能有投資者趁股價反彈沽貨離場，但現價同調查消息首度曝光前嘅14元水平，仍相差逾70%，加上受基本面轉差及傳統再造煙葉行業供過於求等因素拖累，集團去年由盈轉虧，勁蝕逾10億人仔，集團又被指不務正業，即使主席可以復工，前景仍充斥大量不明朗因素。
