【Now財經台】陷入財困嘅內房合景泰富集團(01813)，股價今日爆升，收市報1.02元，勁升逾24%，重返蚊股行列，成交股數係今年以來最多，成交金額超過1億元。合景股價今個月暫時累升64%，係恒生綜合指數及恒生地產建築業指數升幅最大成分股。
不過，今年累計其實跌45%，始終公司喺5月中再有債務違約，未能如期償還逾億美元票據，加上集團旗下位於鴨脷洲嘅臨海豪宅項目凱玥今年開售以來銷售慘淡，推出295個單位，但至今只賣出3伙。不過，《彭博》噚日收市後報道，有潛在買家擬收購凱玥嘅銀團貸款，下周就會同銀行傾，集團可能有機會走出財務困局。
