【輪證下半Part】今朝揀咗隻恒指熊(62355)出嚟，條件要五分鐘圖過底線先至出場。但等咗成朝，條底線都真係硬過條命，點數上叫做有穿過，但技術上真係無；再加上保歷加通道收窄到仲窄過屋企條渠，莫講話喺呢度出倉，就算喺作戰室都只能夠做到開市後首一個鐘內做到好淡各一注，之後大家由等機會變成等開飯。
中午傳出So Ching決定退出Collar嘅消息，雖然程度應該不及新垣結衣同星野源閃婚推低日經指數咁刺激，不過都有可能吸引市場少少目光過去；至少我都想聽下下午可能會開嘅記招。
依家1點31分，恒指點數上未見有太大變化，都只係比Lunch前跌少咗40至50點左右。而喺五分鐘圖，底線仍然未過嘅同時，見到保歷加通道有一下拓闊，指數稍為抽高見過250分鐘線(五分鐘圖50線)後，如今再次向下回落中軸水平。
咁悶嘅格局，都係等睇記招算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
