【Now財經台】廣深鐵路股份(00525)A股今朝開市幾分鐘已漲停板，H股高開8.5%後，升幅不斷擴大，一度大升近16%，高見1.76元，衝上逾3年高位，成交亦急升，仲十分誇張，成交股數較過去100日同時段平均激增20倍。
廣深鐵路今日爆升，相信同內地最新延長回鄉證有效期，准回鄉證過期不足4年嘅港澳居民，即使未能及時辦理續期都可以返內地，解決公幹、探親及旅遊需求。不過，值得留意係，延長回鄉證有效期措施要到5月8日才生效，即使食唔到黃金周假期，措施始終對廣深鐵路有利。
廣深鐵路由炒作通關復常至今，股價已由去年10月底嘅歷史低位，即1.01元，累升逾70%，而業績亦跟得上，集團噚日公布嘅首季業績轉賺4億人仔，廣深鐵路股價喺疫情前於2.5元至3元上落，後市要留意業績及股價係咪可以逐步向上收復。
