【now.com財經】本以為指數都踩入牛證20,600至20,699點重貨區會直接向下殺落去，所以先揀隻恒指熊(53099)出嚟，吼五分鐘圖保歷加中軸唔過就出動。還好喺10點10分已見指數出「大陽燭」一舉將指數推到上中軸以上水平，作戰室全線反手，持貨一個小時左右，終於都確認破位，Set好以小時圖10小時線(小時圖10線)或10分鐘圖500線(10分鐘50線)做目標，未放飯先收割。
如然今朝低開於50天線同啲奶一樣都係假嘅，失而復得之後指數一舉上到半日高位20,899點，呢個位亦同上個星期四(16日)朝早個開市裂口頂部20,887點相約，當然，個裂口一早已經喺上個星期五(17日)補完，之後指數亦都唔會再受制於裂口水平，只不過咁啱得咁橋，20,900點行人止步啫。如果睇返牛熊證街貨圖的話，呢個位都係未踏入熊證第一層嘅21,100至21,199點。午後返嚟會唔會再去多浸，秉成住以牛熊兩邊街貨嘅第一層作為來回跑嘅起/終點上落，都真係要睇返五分鐘圖整條向上嘅保歷加通道條中軸有無支持啦。
下半場開市返嚟見到指數出咗支「大陰燭」向下直落插到去保歷加通道中軸水平，再過多五分鐘連中軸都失守埋，不過再之後就未見指數向住保歷加底線大幅向下，只係咬住中軸底部橫行中，Slow STC(14,3)兩線亦落到接近超賣水平。
換返個小時圖就明啦，由11點至12點同埋依家1點至2點期間呢兩粒燭，都被小時圖上嘅保歷加通道中軸頂住，係就係整條保歷加有上行嘅情況，不過都真係要過到中軸先至可以講然後。今朝揀嘅(53099)仲有無用？梗係有用啦，小時圖中軸唔過，小注出動博向下行一趟唔好咩？BTW，有人話：日線圖過到10天線先至講調整完啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
