【now.com財經】呢期手氣的確麻麻,差不多半個月,【月度報告】暫時只係錄得單位數正數,扣除因交易而產生嘅費用,相信會係【月度報告】有紀錄以來錄得成績最差嘅一個月。嗯,好好的重新檢討一下,出手保險少少先。
今朝揀咗隻恒指熊(52568),其實原因只有一個,就係指數今早向下殺咗最近嗰四層牛證之後回彈,再搵一個DT可以做到觸頂嘅位出淡倉。
一如以往用返Slow STC(14,3)做Swing Trade方法的話,喺今朝11點5分至11點20分,五分鐘圖上見Slow STC(14,3)兩線上到80以上超買至嚴重超買範圍,而咁啱得咁橋,呢個位亦係指數上到保歷加頂線同250分鐘線(五分鐘圖50線)之前水平),吼呢個時侯的確可以將隻(52568)放落場,按期內(52568)高低位做過0.027元/0.034元,平均買入價為0.0305元。
其後指數同Slow STC(14,3)都有順觸底Swing Trade而下行,不過午前於中軸前似有止停情況,唯有再博指數喺午後返嚟再再向下,而唔出「圓底」啦。
好景當然不常架啦,午後返嚟開市頭嗰10分鐘指數都仲靠近喺保歷加中軸附近吽吽下,諗住「圓底」生唔成之際,誰不知喺1點15分指數無啦啦企咗上250分鐘線之上,破位無計,即走無情講。以1點15分起計10分鐘作為走貨時間,期內(52568)高低位做過0.032元/0.024元,平均捉貨價為0.028元,呢趟平均輸兩至三格或8.2%,將目前為止【月度報告】個單位數正數都倒埋出嚟,確認暫時負數。
又有幾多個人真係可以做到長勝將軍?就算【月度報告】由開始到依家都未出現過負數,但一正個月裡面都總會有加加減減,今日個睇返正負數出嚟嘅百分比條數都唔係好大,都反映自己今個月比上個月做得更加保守。重整心態同步伐應該係我首要做嘅事。
好彩,作戰室無乜事啫;依家1點49分,更好彩嘅係及時走咗隻淡倉啫,如果唔係就唔止呢個數咁簡單。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。