【now.com財經】今朝揀咗隻恒指牛(67411)，都講到只限Day Trade，進取嘅吼指數企得到50分鐘線(五分鐘圖10線)落場，安全注當然可以等等Slow STC(14,3)落返超賣先。
以今朝Patreon出文時間10點8分計，On top比多10分鐘作為睇文時間，即10點18分，呢個時間睇返恒指五分鐘圖，指數其實已經失守咗50分鐘線，即係進取方法已經唔Work，唯有等Slow STC(14,3)落到超賣先至出手。
等到10點50分，Slow STC(14,3)終於見到兩線落到超賣水平，呢個時候(67411)可以出場，由呢個位起計10分鐘作為出場時間，期內(67411)高低位做過0.046元/0.4元，平均買入價為0.043元。
落場後指數同Slow STC(14,3)兩線都一齊觸底反彈，用得Slow STC(14,3)喺超賣位入而強調係Day Trade的話，用返Swing Trade嘅方法就最快。喺11點35已經見到Slow STC(14,3)兩線上到超買至嚴重超買範圍，同時保歷加通道都開始見到整條收窄，剛好嗰一個位指數又差唔多上到保歷加通道頂線，唔貪心走隻(67411)的話，按11點35分起計10分鐘內(67411)高低位做過0.052元/0.05元，平均走貨價為0.051元，呢一注極速平均吞八格或18.6%。
依家1點30分，恒指升幅再次收窄，仲有一下落得比較急，依家升87點，報19828點。2022年最後一個交易日都已經取得正數，又往往下半場都係悶局為主，今日都係提早收爐算啦。
記得下個星期一(1月2日)為元旦星期日嘅補假，所以都係紅日，恭喜打工仔們又連放三日啦，下星期二(3日)再見！Say bye to 2022 and welcome 2023！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
