【now.com財經】今朝揀咗隻恒指牛(66449)出嚟，只係用五分鐘圖快炒一趟。按今朝Patreon出文時間為10點29分，On top 比多10分鐘作為刨文時間，即10點39分，再睇返五分鐘圖，見指數已經向上隊高到重上19,600點以上，而Slow STC(14,3)兩線亦已經踩入超買至嚴重超買範圍，如果要Slow STC(14,3)行出超買再超買的話，咁保歷加通道口就必需要拓闊。比多五分鐘指數行就發現指數似乎再無力上，橫行以為指數只係儲氣，結果保歷加通道口收窄，Slow STC(14,3)亦觸頂回落，(66449)無事發生過。
依家1點7分，睇新聞見到講東涌車禍，印象中好似逢每過年前就會有呢啲事發生，的確有啲事係整定，點都無得改變，RIP。
睇返個市，今日上半場其實都幾好玩，作戰室出咗三注，淡 > 好 > 淡然後等完場放飯。到下半場開市之後，指數仍然維持住喺保歷加下降通道橫行中，雖然喺1點18分見保歷加通道口由拓闊變成整條向下，但指數似乎未有再向下落嘅力量，適逢Slow STC(14,3)兩線齊齊落到嚴重超賣位，不如再次拎返隻(66449)出嚟，吼Slow STC(14,3)確認到出觸底反彈後，小注落場過下手癮。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
