【股市脈搏】斬倉疑雲！民富午後突暴瀉

【Now財經台】民富國際(08511)今朝低開逾8%後，早市一直維持呢個跌幅，下晝開市後，跌幅曾短暫收窄，但下午約1時20分，突然「跳崖式」急挫，最多急瀉66%，低見0.08元，收市報0.117元，更成為今日跌幅最大港股。

民富預期，月底出中期業績，要留意集團業績會唔會有改善，還是要連蝕第3個半年。

睇返股權分布，依家只有大股東黃敏智及第2大股東何俊傑有咁大批貨，分別揸住1.44億及4700萬股，到底係咪有股東被斬倉，還是涉及股份轉讓？要留意集團會唔會出通告安撫投資者情緒喇。