【Now財經台】中煤能源(01898)噚晚發盈喜，預期首9個月按年多賺最多66%，即約219億人仔，單計第3季就最多賺74億人仔。
耀才證券研究部總監植耀輝認為，呢個盈喜數字好奇怪，若以下限53億人仔計，第3季會係今年以來表現最差嘅季度，若以上限計，按年錄得升幅，但按季就要倒退。不過，佢提及，大行普遍睇好中煤第3季純利表現，其中富瑞最新估計，集團第3季多賺79%。
至於摩根大通就睇好煤炭股至明年初有能力維持較高嘅股息率，並上調中國神華(01088)及兗礦能源(01171)評級及目標價。Stanley表示，神華係佢首選，又話依家神華股息率有13厘，近幾年派息既穩定又理想，加上公司除咗經營煤炭業務，仲有電力等5瓣業務，盈利前景較其他煤炭股穩定。
