【Now財經台】停牌兩日嘅鳳祥股份(09977)今朝復牌,股價裂口高開逾31%,開市即重上1元,之後升幅一度擴大至近56%,高見1.2元,暫時係升幅第2大港股,成交股數較過去100日同時段平均激增67倍。
鳳祥噚日收市後出通告,指由於控股股東附屬公司祥光銅業唔可以如期還債,所以祥光銅業嘅管理人上周五將公司近71%股權,喺阿里司法拍賣平台拍賣,涉及13.72億人仔,拍賣將會喺10月10日至11日進行,每股起拍價1.383人仔,折合約1.563港元。
值得留意係,若拍賣導致30%或以上股權出現變動,將會觸發強制性全面要約收購,到時作價唔可以低過拍賣價,投資者要繼續觀望事態發展。