【now.com財經】今朝揀咗隻恒指熊(67617)出嚟，恒指嘅故事同噚日個市差唔多，但就似乎將噚日全日嘅走勢濃縮到一個上半場之內行完，只係無咗朝早急插嘅部份，低開高走嘅情況就十足十，所以，即使一早Set好咗進取入市法(用五分鐘圖見指數上唔到50分鐘線(五分鐘圖10線)或100分鐘線(五分鐘圖20線)見阻力先至出動)，但成朝只見指數喺五分鐘圖上係咁上破啲天線，根本出唔到場。
咁都有Set埋安全入市法(Swing Trade方法，Slow STC(14,3)上到超買先至出淡倉)嘅。只不過當Slow STC(14,3)上到超買嘅時侯，一來指數已經上破保歷加通道中軸，二來保歷加通道口已經拓闊返，暗示Slow STC(14,3)有機會行出超買再超買，安全法又唔出得。
最後，指數喺上半場反方向向上逐條逐條平均線向上穿，將跌幅收窄到半場見跌100點都無。再喺下半場開市後見指數愈上愈有，因為保歷加通道口Keep住拓闊，Slow STC(14,3)則繼續喺超買範圍運行，最終喺下半場開市後無耐指數轉燈，依家1點30分，最高暫見20,173點，殺完牛證之後下半場反方向殺熊(今日有19,900至19,999點，同埋20,000至20,099點之間收回嘅熊證上市，只係今日新上市所以未有街貨可言)，上下其手，阿市你玩晒啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
