【now.com財經】今朝揀咗隻港交熊(65141)出嚟,諗住等到五分鐘圖Slow STC(14,3)上返超買位時出動,博行一趟Swing。不過,以上半場計,今朝開市時Slow STC(14,3)兩線上到7X已經係最高,之後Slow STC(14,3)一直向下運行。中午收市時有見Slow STC(14,3)兩線再次向住超買方向上到中軸位嘅,又睇下下晝Slow STC(14,3)點行法啦。
往往呢啲中午時段或者收市後,作戰友嘅戰友s都比較喜歡圍爐吹水,坦白講大家都真係素未謀面,但都feel到大家係交心做朋友,做戰友。今日Group裡面有個壽星仔生日,玩美股玩到凌晨兩點幾嘅佢,啱啱都終於瞓醒見到今朝早戰友s send出嚟嘅祝福。培爺,生日快樂!快啲蜜運成功!
望下恒指嘅鬼樣,其實今日上半場嘅波幅只有148點,而喺五分鐘圖上都會發現今日出嘅陰陽燭,有好幾支都係比較大條(即係五分鐘之內搶高/低嘅速度同幅度好高),但就焗限喺呢148點之內,如同今朝所講,都真係要搵返啲高槓桿嘅證先至可以爬得到格仔,仲要小心見大燭出現去追的話,隨時有左一巴,右一巴嘅情況出現。當發現難捉嘅時侯,一係唔好玩,一係搵個股玩,真係唔好掂佢呀!
下半場開市之後,有見指數未能上破得到保歷加通道中軸,同時保歷加通道口有拓闊嘅情況,於是膽粗粗喺作戰室開淡倉,壽星仔生日落注係唔同啲,見佢都一齊出淡之後指數就瀡咗落去,將今日高低波幅拉到闊晒。至於港交所(00388)嘅股價同樣都隨大市向下瀡咗落去,要等Slow STC(14,3)上返超買嘅話,哼,今日怕且當自己睇中方向,開心下算啦。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。