【now.com財經】今朝揀咗隻恒指熊(50644)出嚟，由於朝早見指數喺小時圖上都衝向保歷加通道中軸，又整條保歷加通道有橫行情況，所以預計指數或可能於小時圖上見保歷加通道中軸覓得支持後，於頂線至底線作Swing Trade來回，咁喺中軸前出淡倉就非常之不利，於是定咗確認小時圖穿到中軸先至好落場。
不過，呢個情況喺今朝早都無出現過，由11點至12點，即上半場最後嗰支小時圖嘅燭，都只係喺保歷加通道中軸之上。而喺五分鐘圖則見指數喺11點25分低見19764點(暫時嘅低位)之後，指數都向返保歷加通道中軸回升，同時保歷加通道口亦有收窄情況，所以喺作戰室上都同戰友們講定，如果淡倉唔過Lunch的話，可以先行離場。
中午時分舊同事忽然Whatsapp問有無舊Router唔要可出讓，又真係屋企有一隻喎，被我收咗喺床下底。做緊嘢時記得我家肥家喺床上面張被度咪埋對眼監視我(哈哈)，諗住睇下佢仲喺唔喺張床上面啦，搵極都搵唔到，去佢平時會匿埋嘅地方都無，個人開始有少少慌即刻Whatsapp被我家老爺知之後，忽然諗起索性掀起張被，就見到一團同張被單「痴地」嘅毛(哈哈)喺被竇走出嚟，真係被佢嚇死。
Lunchtime過後見下半場開市，指數一下子向上突破，重上保歷加上升通道裡面，還好喺Lunchtime前都有叫作戰室裡面嘅戰友走淡倉，如今指數觸底再上，五分鐘圖上見1點12分時指數再次挑戰250分鐘線(五分鐘圖50線)，而小時圖一如所料的於保歷加通道中軸前企穩後，於頂線至中軸行出Swing Trade走勢，同時有條10小時線(小時圖10線)作勢支持，難度呢個位要反手好倉，出恒指牛(51321)，收回價19,400點，同現價有約425點差距，約46.1倍槓桿絕對夠做DT，留意五分鐘圖目前(1點16分)保歷加通道口拓闊中，以小時圖做Trade的話，則睇住小時圖10小時線，一失即走。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
