我的股票

    名稱 現價 升跌

    資料報價延遲十五分鐘

    【輪證下半Part】資金去哪兒?

    【輪證】 2020/07/14 14:50

    【now.com財經】話說今朝早交咗稿幾分鐘,恒指就二話不說地向下急插,直隊落25254點先叫停,25300至25399點嗰過千張期指街貨全數死亡;如果繼續睇淡,再望落去就已經係24900至24999點,呢度有相當於1117張期指街貨,亦係牛證重貨區,但到聽日增加/剩返幾多?估計見大市咁急插法,又呢幾日恒指日升日跌嘅一莊一閒咁開,怕且都可能有唔少資金走入貼價牛。

    今朝無做推介嘅原因,極大部份係受到噚日隻牛仔比我嘅抵打擊,但唔緊要,都係嗰句:100%咁中法,咁就無人會返工啦!重新審視過大市走勢先再落場先係首要要做嘅事,做人嘅嘢,冷靜啲好。

    睇返恒指日線圖,今朝先無咗條10天線(25650點),中間一段時間恒指一度跌逾500點,依家2點16分,叫完外賣喺公司食完再洗返好個外賣盒(回收又好,重用又好,環保啲好),返到埋位就見到恒指跌幅好似又收窄返,依家做緊25433點,跌338點。成堆股份今日似乎係新經濟股跌得最大獲,京東(09618)、小米(01810)、阿里(09988)、美團(03690)閒閒地都跌4%至5%以上,至於隻騰訊(00700),跌幅雖然相對少啲,但日線圖上見都係無咗條10天線,跌幅亦係跑輸大市;至於隻港交所(00388),可能佢同新經濟股關係不大,所以跌幅相對無咁誇張。

    話時話,新經濟股升咗一大浸,呢啲時候咁跌法,倒底係一個追入嘅好時機,還是都真係需要第二梯隊去接力,推返個指數上去?最誠實嘅都莫過於啲資金點走。

    坊間所有發行商都有資金流呢粒數,係要嚟睇返啲錢去咗邊。當選擇Call+牛證(即好倉)嘅時候,今日load出嚟個表就見到最多資金流入好倉嘅就係港交所,排第二就係騰訊,完全符合晒呢兩隻嘢今日嘅走勢點解會係咁。

    如果你話「咁跟住資金流向做方向咪得囉」,咁你就要再諗深一層啦。以港交所為例,因為港交所係輪證介都屬於一隻一線underlying嘅股仔,即Call/Put/牛/熊四樣都齊之餘,仲有有一定數量嘅輪證比你去選擇,所以佢相對畫出嚟嘅街貨圖,參考性一定比三四線underlying,或者只係得Call/牛,無Put/熊嘅高好多;但仍然無恒指咁benchmark。

    當資金入咗好倉之後,牛證街貨增加,引誘推低港交所股價嚟打牛證靶嘅機會率同時亦會增加,如是者再企喺好倉(或者入牛證)而被殺死嘅可能又增加咗,咁仲係唔係跟資金方向企?

    用埋技術分析幫自已諗嘅嘢推高一把。港交所喺上星期五(7月10日)高見$373.6之後,計至依家2點42分,出現三連陰,只係今日暫時見到嘅係「十字星」,有轉勢嘅意思。輔助指標SlowSTC(14,3)同14RSI都於超買水平範圍見回落,而MACD之前嘅「雙牛」,如今就嚟變返做「牛區熊差距」,相對比較著眼嘅就係條DMI,+DI同-DI差距收窄, ADX仲要帶頭下行,弱勢呈現,如今可能只係欠一個下行嘅理由(或藉口)。

    當然,唔會咁冒險啦,始終強勢股係要比番幾薄面,所以用住paper trade呢個方法,重點係要重拾返市場嘅走勢先。(輸一次仲唔夠咩!)

    作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。

    FB:輪證贏家

    想睇更多財經消息