我的股票

    名稱 現價 升跌

    資料報價延遲十五分鐘

    【輪證下半part】遠牛博見「早晨之星」

    【輪證】 2020/02/03 13:46

    【now.com財經】依家1點7分,趁頭先有一個鐘頭空檔,將屋企最後一盒糕煎埋嚟當lunch;落一次街就少一個口罩架啦!

    洗完碗同煎pan之後,下半場已經開始,恒指今朝早表現實在太飄忽,先跌後倒升,然後再repeat一次,依家做緊26376點,升64點,最高見過26512點,但距離熊證第一層街貨27900至27999點,仲有近1400點嘅差距。

    坦白講呢個位博反彈真係不為過,依家距離收市仲有兩個半鐘有多,日線圖上如果喺收市前都係咁上下樣嘅話,少少地一注博隻牛證過夜,第二日反彈收工亦未嘗不可,當然穩陣嚟講就更係唔好揀隻咁貼價架啦,將收回價拉到去26000點以下,如恒指牛(57600),收回價25900點,54倍槓桿比率都夠博第二日裂口,但建議如果係博第二日一早真係彈高而食嗰一浸嘅話,都係等到三點打後先至好喺5分鐘圖搵個位入市,搵唔到位都唔好勉強入呀,終於今日個市雖然未至於過山車,但都好似海盜船咁,時升時跌。

    今朝漏咗一樣嘢無跟進,就係上個星期五推嘅恒指Put(12817)。按返恒指5分鐘圖走勢,喺上星期五下半場,3點15分至3點50分期間,SlowSTC(14,3)上到超買位,雖然未至於係嚴重超買位,但見7X至8X呢啲水平都唔怕小注一試,以當時(12817)高低位做過$0.94/$0.091計,平均買入價就係$0.0925。

    今朝恒指再次下行,雖然跌幅點數唔係多,得百零點,但都足以將(12817)搶高至開市首五分鐘先$0.1元以上水平,最高更見$0.103,按開市頭10分鐘圖,(12817)高低位$0.103/$0.096,平均賣出價就係$0.0995,對比平均買入價,持貨過夜即賺7.6%。

    Miss咗都唔係問題,話過今日個市左右兩邊走,喺今朝早10點55分至11點20分,恒指再次下行時,5分鐘圖上SlowSTC(14,3)再次落到超賣位,今次仲要係嚴重超賣添,按當時(12817)嘅高低位$0.101/0.097計,平均賣出價就係$0.099,計落同朝早一開市即走嘅賺幅差唔多。

    若然繼績揸住到依家嘅話,見(12817)報$0.09,同平均買入價比,都叫做仲可以守得住,而5分鐘圖上SlowSTC(14,3)由嚴重超買向下出發中,計過數想止賺嘅,準備啦。

    作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

    電郵:gladyshan@gmail.com;FB:輪證贏家

     

    想睇更多財經消息