我的股票

    名稱 現價 升跌

    資料報價延遲十五分鐘

    【輪證下半Part】篇文係噚日打定嘅

    【輪證】 2019/07/17 14:30

    【now.com財經】對於做Online Media嘅人嚟講,CMS同FB最偉大嘅地方係咩呀?其中一樣就係可以Schehule文呀嘛~呢篇文係我噚日已經準備好,係我同戰友Jack嘅對話。

    未開始之前先同大家講明,雖然我係一個80後,但喺投資路上我所做嘅嘢,絕大部份同一個「80歲」後係無分別。無錯,我就係一個阿婆,逐少逐少儲收息股,仲要只係自己識嘅範圍嗰堆;依家興5G?我唔知,我只知我每日都要搭車返工、食飯、每個月出糧就要供樓、放假同我家老爺行吓街、去吓旅行咁。後來仲傳染埋我家老爺,兩條老嘢個個月供完樓之後,就係喺度儲收息股。

    噚日我同戰友Jack whatspp講乜嘢?嚟啦喎。

    我=我;戰友Jack=戰友Jack

    我:地鐵(00066)破位...係再破位

    戰友Jack send咗嗰好驚訝嘅emoji icon比我之後,就話:Cafe de Coral...(即係大家樂(00341))

    我:破頂?#52(大快活(00052),我哋通常都係講number,好似撻全朵)有電競餐廳(喺Emax地下,我哋想去但人實在太多了,熱潮嘅嘢都真係唔啱我哋班老人家去做)

    戰友Jack:但我覺得#341好食過#52喎

    我:我幫襯#52多啲,因為近我...咁你覺得#66勁定#341醒?

    戰友Jack:#341,因為嘢 一定要食, 地鐵唔一定要搭;熊一就買衣食住行股(接住一個伸脷嘅emoji icon)

    我:但係地鐵係香港獨家鐵路喎;唔食#341,可以食#52、#1314(翠華(01314),或者#6811(太興(06811))

    戰友Jack:唔搭地鐵,可以搭巴士架嘛,有#62(載通(00062),亦即係九巴同龍運巴士)、#77(進智公共交通(00077),做專線小巴同村巴)同埋#306(冠忠巴士,有做大嶼山巴士)

    (本身仲有講隻中華汽車(00026),但翻查資料呢隻嘢一早已經無做巴士,旗下路線被城巴同九巴喺競投下瓜分,又或者直接被政府收咗皮,依家已經變身 成為一隻地產股。而佢最「值錢」嘅應該就係喺柴灣舊巴士廠塊地,同TVB(00511)一樣,最吸睛嘅就係清水灣塊地,不過被復星國際(00656)買咗,今年4月頭先被城規會通過咗話可以改建成為住宅及酒店項目,而地標行政大樓則獲原址保留。我仲答咗戰友Jack一句:撐得住TVB個股價,唔通真係因為啲劇好睇咩...)

    我:地鐵係公用股之餘,仲係半住地產股,有上蓋物業又有商場喎,順便食埋地產個勢喎

    戰友Jack:仲有新站咩?好似全部上蓋都起晒/起緊啦

    我:仲有高鐵呢,有政府個XX補貼架嘛!

    其實呢啲話題確實係沒完沒了,事關每個人嘅愛股都唔一樣,捧每個場、支持邊一邊都係大家嘅自由,今日我哋為咗#341同#66進行一個激烈而又中間穿插咗好多廢話嘅討論,他朝有一日難保維他奶(00345)咸魚翻生,又再隊過;又或者你哋心目中嘅愛股同我哋兩個有唔同。

    不過,有一句好真,幾乎可以用歷久不衰嚟形容:熊一就買衣食住行股啦。好老套但係一個事實:市場係由人所創造出嚟,亦都係由人去進行運作/買賣,基本上呢個市場除咗所謂嘅技術分析之外,仲有人性嘅分析要去處理,亦即係傳說中嘅「市場心理學」(唔係媽劇停嗰個市場呀,OK?!)。

    假設經濟真係轉差,好似2003年沙士咁,個個都節衣縮食,為保份工為上,慳得就慳,留意番,衫可以唔買,旅行都可以忍住唔去(或者由歐洲變長洲),但係衣食住行你只可慳,你唔可以唔洗。

    你可能由去酒樓,例如富臨(01443)、利寶閣(01869)、敘福樓(01978),變成我哋頭先所講嘅快餐店,甚至你會索性去買餸煮飯(邊個嘅資產裡面有最多街市?你懂的)。為咗返工你要搭車,你可能由自己揸車>坐的士>坐公交。樓,供嘅頂硬上,租嘅搵平啲。

    「係咪真係要咁樣過日子呀?」正常又真係唔會去到咁嘅地步,坦白講每個人都會成長,經歷過1997金融風暴、到2003年沙士、再到2008年金融海嘯,我哋學識咗經濟係有佢嘅Cycle,只要我當時勇敢啲就會用時間捱得過(亦都即係所謂用時間值去換取資產升值)。

    我問你,如果依家(Touch wood)香港嘅樓唔好話落返去沙土價,求其跌10%至15%,你會點做?

    你又覺得點呢?同意請分享,分享是美德,好人一世平安(哈哈~)

    作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

    電郵:gladyshan@gmail.com;FB:輪證贏家

    想睇更多財經消息