我的股票

    名稱 現價 升跌

    資料報價延遲十五分鐘

    【輪證下半part】我到底寫咗啲乜

    【輪證】 2019/07/05 15:16

    【now.com財經】依家2點23分,恒指做緊28805點,升9點,今日個市悶到都唔知跌轉升、升轉跌,再跌轉升幾多次,真係無乜心機睇;呆到依家2點36分,恒指做緊28795點,跌1點,大佬,我真係無嘢講。

    呢啲咁無方向嘅市,一係啲錢就離開咗個市場,一係就炒股唔炒市,見領展(00823)、煤氣(00003)、友邦(01299)、地鐵(00066)係咁被人炒上去就知;反而之後大熱嘅維他奶(00345)就無咗影,開佢日線圖圖見知原來呢隻嘢早排一仆一碌咁,但依家先日線圖SlowSTC(14,3)落去嚴重超賣水平,可惜被條10天線($37.085)頂住,依家橫行狀態換保歷加通道出嚟無乜意意。而基本面其實維他奶一啲都唔曳,專注做好佢嘅飲品業務咁多年,年年都有穩定嘅收入,雖然唔係話超級引股息,但都引到一班穩打穩紮嘅老散垂青。但股價去到呢啲位,再跌嘅空間係有限,但亦無人話過唔可以超賣再超賣嘅,上得返條10天線再算。

    至於友邦,今朝咪寫過隻Budweiser IPO嘅,老老竇竇,寫緊Budweiser時都有諗起友邦,事關覺得個背景有啲似,又係阿媽推個仔出嚟上市,而個仔上市嗰時又係被冠「XX王」嗰啲名,業務又係主攻亞太區,又係響晒朵。不過,友邦上市嗰時係幫阿媽填數;但Budweiser就無基石投資者,但當年友邦幾經辛苦都叫做搵咗六個基石投資者返嚟。

    睇返友邦日線圖,見佢同大市一樣都係喺6月19日一嘢就彈咗上去,到依家上到$85附近呢啲位,就咁睇呢段路係有一浪高於一浪嘅味道。但可惜SlowSTC(14,3)%K線高位跌穿條%D線,14RSI都已經上到72水平;單睇7月頭呢個星期,升幅好似無之前咁斜,怕且推高大市都要搵下一隻接力。

    6月嗰時已經講咗話將會係8月1日加價嘅煤氣,喺股價上似乎無因為加價一事而彈起(至少無今日隻日清(01475)咁明顯)。煤氣其實同領展一樣可以用五個字形容:悶聲發大財。所考驗嘅就係投資者對時間嘅耐力,見到價好就走係呢件事係絕對適用於大部份嘅股票,唯獨是呢啲公用股,價好就走下一個step就好容易變成恨錯難返。有勇氣係佢創新高(即無蟹貨)時入嘅話,不如再比多少少勇氣同佢長相廝守。

    「係咪要煲到呢兩隻嘢好似無咗佢會死咁呀?」說話又唔好咁講,新一代示威股地鐵都有呢個potential架,仲要撈埋香港最強行業之一地產界添。

    又咁講,以前啲人成日話Buy and Hold,但就話依家無呢支歌仔唱,大佬呀,你個年代係滙控(00005),我個年代咪煤氣,再下一個年代咪Reits...時代唔同呀,你估90後/00後唔想喺十零廿蚊時買領展?你估我唔想係幾蚊嗰時買滙控咩?你估如果依家個生活環境、氣氛係OK嘅話,你估我哋真係唔會向前望、有希望咩...

    作者阿珊,任財經/投資版傳媒人十幾年,《鐘擺戰策贏港股》作者。用技術分析專心玩輪證,唔貪心,志在搵餐下午茶。

    電郵:gladyshan@gmail.com;Weibo[下半part]:#Gladyshan#

    想睇更多財經消息