【環球金融快線】華為就快爬Apple頭？

【Now財經台】蘋果公司(Apple Inc.)下周四(5月2日)公布截止3月底季績，市場關注中國市場嘅表現。雖然今年初iPhone喺內地減過價，但研究公司Counterpoint數據顯示，蘋果iPhone首季中國銷售仍大跌19%，係2020年以嚟最差一季。

Counterpoint又估計，Apple喺內地市佔率跌至第3位，排喺Vivo及榮耀之後，華為及Oppo亦緊隨其後。易方資本助理基金經理王逸研認為，Apple短期難以逆轉內地銷售疲弱嘅困局，去年重返手機市場嘅華為將會係公司嘅頭號對手。

Issac指出，華為而家唔只靠支持國貨嘅情緒去帶動銷量，旗下手機喺規格同價錢上具競爭力。公司上年推出嘅Mate 60大受好評，本月開賣嘅旗艦攝影手機Pura 70設有可伸縮鏡頭嘅創新設計，影像質素亦大大提升。另一賣點係搭載國產麒麟9010晶片，性能相當接近高通(Qualcomm)2022年底推出、應用喺多款安卓(Android)旗艦手機嘅Snapdragon 8 Gen 2。

佢續指，內地手機市場嘅消費情緒減弱，今年初三星(Samsung)、榮耀等廠商嘗試帶動AI手機熱潮未見成功，亦令Apple喺中國舉步維艱。