【環球金融快線】印度難複製內地高增長故事

【Now財經台】據《彭博》引述消息指，去年喺印度組裝嘅iPhone出廠價值倍升至140億美元，佔iPhone整體產值14%，即每7部iPhone就有1部喺印度組裝。此外，Tesla行政總裁馬斯克(Elon Musk)今個月會去印度同總理莫迪(Narendra Modi)會面，估計到時會宣布喺當地開設新廠房。蘋果公司(Apple Inc.)及Tesla兩大美國巨企先後到印度設廠，印度經濟前景係咪「錢」途無限？

資深經濟師羅家聰指，美國巨企去印度開廠，唔會咁快帶動到當地經濟，最快要幾年後見到較明顯嘅成績，呢啲投資消息可以炒起個別相關板塊，但要推高國內生產總值(GDP)就冇咁快。

KC又話，美企逐步將生產線搬離內地，應該係想分散風險，唔係想其中一邊成為成產主力，現時有部分中價位生產線已轉移至其他東南亞國家，甚至搬返歐美。佢續指，雖然印度搶到部份高增值生產線，前景相對睇好，但要複製內地2006年GDP高逾10%嘅增長故事較難。