【環球金融快線】減息因素影響唔到美股

【Now財經台】美國3月經濟及就業數據升幅超預期，令聯儲局減息時間再出現變數，市場對6月減息嘅憧憬降溫，美國10年期債息升至約4.4厘水平，美息走向似乎愈來愈難估計，對美國股市及債市今季走勢有幾大影響？

獨立市場策略師陳俊文估計，美息會繼續向下調，若之後嘅通脹數據一如聯儲局預期輕微降溫，局方仍有減息空間，但減息時間及次數始終要睇數據，加上最新公布嘅就業數據強勁，聯儲局暫時冇減息嘅逼切性，但下半年或今季開始有減息條件﹐估計今年會減息2至3次，始終美國通脹仍未達標。

Norman又指，美息仍然係左右美股其中一個最主要因素，而美國債息有機會挑戰4.5厘水平，美股升勢持續，3大指數同歷史高位只相差1%至2%，市場對聯儲局推遲減息嘅預期進一步升温，反映美國經濟強勁，亦令市場唔太擔心息口問題，始終經濟強勁有助美股企喺高位。