【期匯決算】美匯指數有力挑戰105

【Now財經台】美國3月非農就業數據強勁，遠超市場預期，加上失業率下跌，刺激長債息及美元向上。美國周三(10日)就會出3月通脹數據，市場預期，消費者物價指數(CPI)及生產物價指數(PPI)按年升幅擴大，但按月升幅將雙雙收窄。數據出爐前，美匯指數喺104.3水平上落，美元後市係咪仍偏向強勢？

獨立商品外匯分析師林銘添指，雖然近期就業及通脹數據向上，但市場仍預期聯儲局會喺6月減息，喺市場預期通脹及零售數據向上下，美匯指數有力挑戰105水平，但由於投資者對呢個位有戒心，加上減息預期，所以美匯指數暫時會受制於105水平。