【期匯決算】美國變「春江鴨」密密入油？

【Now財經台】烏克蘭繼續攻擊俄羅斯煉油設施，中東局勢再度緊張，加上美國最新公布原油庫存減少，進一步支持油價，倫敦布蘭特期油一度升至每桶90美元水平，紐約期油亦升至穿85美元。

另一邊廂，石油出口國組織及盟友(OPEC+)今晚有部長級會議，市場料會改變產量政策。環球期貨交易所客席講師鍾俊鏘預期，油價升至現水平，OPEC+成員國好大機會由減產轉為增產，或者偷偷地賣多啲油，將會短線或利淡油價。不過，中長線而言，Joe認為地緣政治局勢先係主導石油、黃金等戰略資產價格嘅因素，並指美國近期不尋常嘅戰略石油儲備政策，對市場有啟示。

Joe分析指，前幾年紐油升至約90美元高位後，美國為咗平抑油價，一度不斷釋放戰略石油庫存。直至去年12月中起，以平均70美元至逾80美元，每周增持約75萬桶石油，即使最近油價再度迫近90美元，仍然繼續每周「入油」，並猜測係因為美國預視到未來石油會出現較大需求，油價好難再跌穿80美元，而趁現水平補充石油庫存。