【息賺】友邦唔再係股息貴族首選?
【分析】 2024/04/08 17:16
【Now財經台】友邦保險(01299)係3月表現最差高息股,集團3月中出完業績後,股價一直尋底,更一度跌到50元邊緣,係咪反映股息貴族都未必係一個好選擇?
香港大學房地產及建設系客席副教授楊書健指,友邦上市後只得1年冇增加股息,而管理層舊年仲肯做回購,公司又會公布基本自由盈餘,即保險公司真正屬於股東嘅錢,只係增長2%,但每股計就按年增長5%,呢兩個數嘅分別在於做咗回購,因為總股數少咗。佢又話,短期策略方面,管理層都會跟足去做。
此外,內地及本港保險股今年明顯跑輸外圍,例如安碩美國保險股ETF(IAK)今年已累升17%,點解會出現呢個情況?
Victor認為,保險公司除咗睇新業務價值,亦要睇投資組合,喺亞洲股票及債券弱勢下,如果投資回報比預期少咗1%至2%,可能已經係全年嘅生意,全年就等於白做。