【息賺】本港樓價跌夠未睇兩個因素？

【Now財經台】港股一潭死水外，樓市即使「減辣」後都冇起色，一般而言，股市會比樓市行前約半年，中原城市領先指數(CCL)現處於6年半低位，已跌至2017年第1季水平，樓市仲有幾大下跌空間？港元拆息持續扯高，其中，跟樓按相關嘅1個月拆息，最新報5.534厘水平，亦睇唔到有回落跡象，係咪都好難吸引買家入市？

中原資產管理投資總監洪龍荃認為，依家本港樓市主要係信心問題，有唔少人將資金存入銀行造定存等，現時係欠缺1個吸引投資者入市嘅契機。佢又話，之前樓市輾轉回落，唔少人覺得可能愈遲買愈抵，本港息口係跟住美息走，若美國聯儲局明年真係減息一至兩次，都會對本港樓市有助。此外，本港經濟係另1個因素，通關後本港實體經濟一直麻麻，呢方面都會影響市場點樣睇樓價。

佢續指，若本港經濟之後冇明顯轉差，而明年又真係減息，樓價有機會已經跌夠。