【名家給力場】聯儲局估錯中性利率水平？

【Now財經台】正當市場炒緊美國6月開始減息嘅預期，財長耶倫(Janet Yellen)周三(13日)表示，美國利率冇可能重返疫情前水平，但唔擔心出現滯脹。

早前，美國前財長薩默斯(Lawrence Summers)指出，基本因素已出現變化，認為聯儲局對中性利率水平為2.5厘嘅估算有錯，實際應該接近4厘，而當局今年可能唔會減息。

資深銀行家張泰強直言，佢沒有水晶球，唔會去估計最終中性利率水平，但認同利率冇可能落返2厘水平。佢解釋指，以往供應鏈全球化能有效降低生產成本，係遏制全球通脹嘅良策，但新冠疫情破壞咗國際間合作，現時更係地緣政治衝突頻生，供應鏈已經冇可能完全回復到疫情前嘅狀態。

張泰強又指，特朗普時期貿易保護主義抬頭並加徵進口關稅，本來利潤微薄嘅生產商唯有漲價應對，上游物價通脹最終轉嫁至美國人民身上，亦令當地通脹高居不下，擔心會出現滯脹風險。