【名家給力場】莫家強:擔心美股起泡言之尚早

【Now財經台】美股喺人工智能(AI)熱潮帶動下最新一波升勢，已經喺上周五(8日)暫告一段落，「科技7雄」(Magnificent Seven)之一嘅英偉達(Nvidia)亦終止6連升，喺科技股拖累下，美股3大指數昨晚(11日)受壓，其中，納指連跌兩個交易日。據《彭博》終端機計算，依家美股市盈率(PE)約25倍，高於過去50年平均水平，美股係咪正醞釀緊泡沫？

資深投資者莫家強指，市場對美股係咪有泡沫有唔同睇法，如果同泡沫最勁時期比較仍有一大段距離，但佢提醒，如果只以市盈率(PE)去衡量股市平貴係好危險，因為唔同股份嘅合理PE都唔同，例如Nvidia近期升得比較誇張，但蘋果公司(Apple Inc.)已經冇升過一段時間，微軟(Miscrosoft)等科企升幅就唔大，所以擔心有泡沫係言之尚早。

至於美股前景，Alex就認為，暫時睇唔到美股會去到邊個位，相信會不停打破目標，因為背後仍有好多利益，所以美股暫時唔會咁易崩潰，除非出現重磅壞消息，否則，未來上升嘅機會仍比較大，唯一擔心係短期有調整風險，所以要做好風險管理，但中長線而言，美股應該未升完。