【股市脈搏】維達轉勢還是「死貓彈」仲要睇

【Now財經台】維達國際(03331)股價連跌12日，累跌近20%，錄得上市以來最長跌浪後，今朝終於有喘定跡象。

集團已於7月20日出咗中期業績，股價喺業績前已經跌緊，最終份業績真係幾嚇人，業績「死因」係公司未消化到高價木漿，拖累毛利率及盈利。

股價噚日跌到15.2元嘅9個月低位，已低過大行嘅最低目標價，睇返日線圖，維達14天RSI已落到約15，係逾10年最超賣，依家喺15元水平開始揾到支持。

維達今年預測市盈率(PE)約28倍，估值仍然唔算平，今日喺低位成交唔算多，相信要再觀察多幾日先可以確認係咪轉勢，還是只係超賣反彈。