【Now財經台】灣仔、銅鑼灣及尖沙咀等地區，商舖空置率微升不足1%，近年呢啲地區嘅租戶結構係咪出現轉變？
中原工商舖租賃部高級區域營業董事何潔釵表示，過往本港商舖租戶結構會較側重歐美外資品牌，但睇返過去1年嘅數據，來自內地嘅商戶數量明顯增加，呢啲內地品牌希望借助香港嘅國際平台優勢向海外發展，有幾個優質地段如中環、銅鑼灣百德新街嘅恒隆中心，都開始出現內地服裝品牌，呢個情況喺以往係比較少見。
對於近期商舖結業情況，Terry認為，唔代表整體市道差，雖然本港零售市道疲弱，主要受網購影響，但近期高消費市場有向上趨勢，網購可能只係對低消費、民生行業影響較大，高質素零售市場似乎已揾到方向，亦搵到支持位。
