【Now財經台】IP經濟熱潮持續升溫，其中，泡泡瑪特(09992)股價今日(7日)成功重返「紅底股」，可能同公司吸金王Labubu推出「象棋大冒險」系列，仲有公司同內地春節票房大贏家《哪吒2》Cross over嘅盲盒有關，市場借勢炒一轉。
公司昨晚喺網上開賣其中兩款Labubu新搪膠毛絨公仔，數十萬人好早已湧入POP MART官網等搶貨，據說開售唔夠10秒就全部賣晒，十分誇張，而Cross over《哪吒2》嘅盲盒亦賣到斷市，雖然呢啲「場面」都唔係新鮮事，但都帶挈泡泡瑪特股價今日食住銷售報捷呢個勢，相隔多年再成功重上100元。
「股神」巴菲特(Warren Buffett)曾經講過，如果鍾意某樣產品，而公司又有上市，就應該買埋佢嘅股票，如果1年前買入泡泡瑪特嘅股票，到依家仍未沽出，帳面已大賺超過4倍，「股神」嘅投資心法似乎真係有參考價值。
