【now.com財經】記得睇過一本書，書名同作者都唔係好記得啦，裡面有一句說話係(大約)：當你好努力咁為自己嘅財富增值嘅時侯，試下將部份賺返嚟嘅錢(可能一成)用嚟做一啲娛樂，甚至係任性嘅揮霍，然後好好咁記住嗰種快感，因為呢種快感會成為你下一個再搵到一舊錢返嚟嘅動力。
於是噚日我同我家老爺迫咗去Apple Store度，為嘅並唔係新出嘅iPad，而係獎勵下自己換部新Macbook。兩個老人家再食完好西先返屋企。辛苦工作，為嘅都係簡單過日子啫。
我諗呢期大家如果係咁出好倉嘅話，都應該唔止贏到部Macbook咁簡單；今朝恒指再抽多189點，開市報18,262點。不過呢期好倉難出，雖然之前喺182xx-186xx呢啲位做過整固，之後再向上行到嚟依家19,000點樓上，一個月鬆啲累升逾3,000點，即使今日騰訊(00700)再咬實400蚊，但係都仲有中移(00941)、小米(01810)、中海油(00883)、友邦(01299)同港交所(00388)倒緊米(@9點42分)；加多隻阿里(09988)添。
仲有15分鐘先至到10點，暫時指數最低見過19,114點，同依家見嘅小時圖10線19,109點都只係爭5點，作戰室今日先出淡倉做高開低走策略，目標見線就算嘅，15分鐘後都收晒工；正數先嘛。
10點打後見指數重新再次企喺小時圖10線之上，不過保歷加通道口仍然收窄中，作戰室出倉都唔敢留得太耐，暫時都只係借住五分鐘圖10線走，同步五分鐘圖見出「三角形」，的確有啲麻煩。
「方向未明，咁可以點做呀？」等方向囉；買大細的話，過澳門啦！
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
