【Now財經台】雖然碧桂園(02007)上周成功再融資，但集團有多隻境內債急挫，總裁李長江又減持公司股份，即使集團上半年交付量冠絕全行，但都止唔到瀉。此外，內地推動大型城市「城中村」改造，但摩根大通大潑冷水，仲狠削碧桂園系目標價60%至70%，其中，碧桂園服務(06098)今日急瀉近18%，不過，摩通認為，中央唔會對大型內房見死不救，會有「泵水」誘因，現階段撈底難度及風險又點睇？
元宇證券投資總監林嘉麒認為，碧桂園股價低處未算低，仍有機會再跌，始終市場對內房股冇信心，市場認為，中央唔希望見到再有內房出事呢個諗法係合理，即使內房可以避過倒閉一劫，但盈利及股價表現唔一定會好轉，債務問題仍然存在，所以現階段唔係買內房股，甚至撈底嘅好時機。
